حلم مجنون

لاء صحيح مجنون مجنون قال ايه عندنا فى مصر حوالى 32 واحد عندهم 20 مليون وأكتر قال ايه لو العدد ده اتبرع ب نص مليون بس، ، حيبقى كده معانا ف الصندوق 16 مليون جنيه وبما ان عددنا وصل 80 مليون يعنى تقريبا 16مليون اسرة ، يا سلام ،، وبكده يكون نصيب كل اسرة مليون جنيه ، والكل ياخد نصيبه ف وقت واحد ؛ يا سلام اما حلم جميل بشكل الله هو الحلم ده كتير

الحلم الاول ....زبالة

اعداد المصريين زادت ده صحيح ، مستخدمى التكنولوجى و خريجى مدارس اللغات و شهادات الجى سى , و الدى جى وخلافه زاد طبعا و طبعا الزبالة زادت نتيجة استهلاك اكتر من اعداد اكبر و اكبر ، طيب ازاى حتتلم فضلاتنا و زبالتنا دلوقتى ،طيب تعالوا نشوف ايه اللى بيحصل اليومين دول ، عامل النظافة اختفى، كل بيت يتصرف لوحده اللى عنده بواب يعدى ياخد الكيس الاسود و يرميه ف مكان بعيد عن البيت ده ، وده طبعا اكيد جنب بيت حد تانى كاتب ادام بيته من فضلك ممنوع القاء الزبالة هنا عشان عربية البلدية اتعودت تعدى عند المكان ده وتلاقى زبالة اربع او خمس بيوت ف المكان ده ، و عشان العربية دى ليس لها ميعاد محدد ، وعلشان الناس مش متعودة ع نظام ثابت فكل واحد بيرمى زبالة بيته وقت ما الكيس يتملى ع آخره و مالوش دعوة حيتشال امتى ، علشان كده تلاقى دايما يا عينى كل شارع فيه ع الاقل بيت او اتنين دايما قدامه زبالة طول اليوم ،السؤال دلوقت ينفع يكون ده نظام حياتنا ، اكيد لاء ، عشان كده كان لازم يكون حلمى الاول انى الاقى صندوق بلاستيك كبير بغطا امام كل بيت ( ومايتسرقش ) والاقى عربية الحى المخصصة للنظافة ف ميعاد ثابت كل يوم ( زى بالضبط باصات المدارس تلاقيها بتعدى كل يوم ع نفس الخطوط ف مواعيد ثابتة )،ايه ده، ده باين الحلم ده ممكن يتحقق ولا ايه ، المهز،العربية تعدى تاخد الاكياس السودا من غير ما تتفتح و تتحط ف العربية المخصصة للاكياس دى و تكون العربية دى مغطاه عشان العمال اللى عليها ما يمرضوش و عشان زبالتنا ما تترماش ف الشوارع تانى كلها و عشان الزباب مايدخلش بيوتنا ومعاه رسايل غضب من زبالتنا اننا ضحينا بيها و استغنينا عنها و طردناها من بيوتنا ، السؤال الحلم ده حيفضل حلم ف خيالى و بس ولا ممكن يتحقق و نشوفه حقيقة ، والاهم من كده نعمل احنا ايه عشان نحرك الحلم ده ، يارب يتحقق و انا عايش